sab kuchh jaan kar bhi dil kyu bane anjaan,
seh kar sitam saare bas reh jaata hairaan.
khwahishon ko jaga kar bharna chahe ye udaan,
bhula, kho chuka hai parr, parinda ye naadaan.
nikla ek kali jaisa, aas lagi kya rang layega,
jo dikhi rang ki jhalak, socha kya mehak failayega.
hai bekhabar khudse wo tumko kya batlayega,
iss jag ki daud dhup mein khile bina murjhayega.
chal pada jo raah chun kar, manzil ko wo payega.
jo saath mile apno ka, har aandhi se takrayega.
na hai prasoon bichhe kahin, jis raste bhi tu jayega,
peer seh ke jo badh chala, sachcha manuj kehlayega.
bharosa rakh iss vihang ka, bharega ye udaan,
dikhega nutan rang ka, poore honge jab armaan.
mukur bhi naa chhupa sakega teri ye pehchaan,
laut ayega niketan fir, parinda ye naadaan...
-Aniket Singh
16-June-2012
© Copyright 2012 Aniket Singh. All rights reserved.
